Windows 進階安裝教程 (命令提示字元)

前言

由於 Rime 呢個輸入法嘅設計主要係偏向 macOS 同埋 Linux，Windows 版本（小狼毫）有好多功能（尤其個方案配置器）都需要用家自己調整先用得到。呢個教程主要就係講解點樣設定小狼毫輸入法先可以令到個體驗好似 macOS 同埋 Linux 原生版咁方便。

如果你只係想求其裝咗個輸入法，有得用粵拼輸入法就算嘅話，呢個教程唔啱你，請參閱新手版嘅 Windows 安裝教程。

1 安裝 Rime、粵語輸入法方案同埋相關程式

1.1 安裝小狼毫前端程式輸入法

1. 去呢度下載小狼毫前端程式安裝器 https://rime.im/.
2. 運行安裝器，安裝小狼毫。入面佢可能會問你要將個輸入法安裝喺邊度，呢個時候安裝係預設嘅路徑就可以嘞。如果改咗安裝路徑嘅話，下面第二部嘅配置可能會用唔到，敬請注意。
3. 重開電腦，確保安裝冇出現錯誤。如果出咗事嘅話請由(1)開始做過。

1.2 安裝 Git for Windows

1. 去呢度下載Git for Windows installer: https://gitforwindows.org/
2. 安裝Git for Windows 同埋 Git Bash。（如果喺安裝嘅時候揀咗「將其他UNIX小工具都加埋入PATH」嘅話就可以直接跳去(4)）
3. 喺 PATH 參數入面加入 path\to\git\\cmd，path\to\git\\mingw64\bin 同埋 path\to\git\\usr\bin. 如果你係用緊預設安裝路徑嘅話，可以參考以下嘅指令：

SETX /M PATH "%PATH%;%ProgramFiles%\Git\cmd;%ProgramFiles%\Git\mingw64\bin;%ProgramFiles%\Git\usr\bin"

註：用呢條指令之前請確保所有環境參數對應你嘅安裝路徑。若果你唔係100%知道自己做緊啲咩嘅話，又或者唔確定安裝路徑係唔係100%正確嘅話，就千祈唔好運行呢條指令，情願行多次(2)，喺安裝器度選擇「將其他UNIX小工具都加埋入PATH」好過。使用不當可能會磚咗部電腦，請自行衡量風險先好用。

4. 測試喺 cmd 入面輸入 bash 可唔可以啓用 bash。如果出現錯誤（例如"bash" is not recognized as an internal or external command...）請檢查 Git Bash 有冇正確安裝，又或者 PATH 參數嘅設定有冇錯。

1.3 東風破方案配置器、安裝廣東話輸入法

1. 啓用小狼毫輸入法，喺「中」上面右擊，打開【輸入法設定】
2. 撳【獲取更多輸入法】
3. 喺彈出嚟個 console 入面輸入 git，確定程式回傳 Found git
4. 輸入 :preset，確定程式冇回傳錯誤，而且顯示嘅介面係彩色嘅，就好似下圖咁：
5. 如果冇回傳錯誤，咁恭喜你，你已經成功安裝咗小狼毫。跟住可以喺 console 版面入面輸入以下指令嚟安裝廣東話輸入法同埋相關嘅檔案：(包括Emoji 資料，語法模型，新版嘅繁簡轉換器）

cantonese emoji lotem/rime-octagram-data lotem/rime-octagram-data@hant lotem/rime-octagram-data:customize:schema=jyut6ping3,model=hant

6. 閂咗個 cmd 版面，然後喺【方案選單設定】度勾選「粵語拼音」，撳「中」
7. 揀啱自己中意嘅主題，再咁「中」
8. 重新部署之後撳 Ctrl + `，喺「方案選單」度選取「粵語拼音」。（可能要撳 = 翻頁先會見到）

搞掂！！

---

(Under Construction)

2 自定義

如果你已經完成咗上面嘅步驟嘅話，但係嫌個輸入法都係唔係幾好用，想自己改下啲配色，字體，快捷鍵之類，噉就可以參考下面呢個教程嚟配置。

2.1 基本知識

要自定義 Rime 嘅話就先要明白 Rime 大概個結構同埋啲配置檔喺邊度：

2.1.1 小狼毫檔案路徑

• 如果冇改過安裝路徑嘅話，「程式資料夾」 會安裝喺 %ProgramFiles(x86)%\Rime\weasel-%VERSION%\ 入面，其中 %VERSION%參數指嘅係小狼毫嘅版本號碼。呢個資料夾放嘅係出廠嘅配置設定同埋預設嘅輸入法資料（普通話拼音，倉頡等）。
  • 千祈千祈唔好改「程式資料夾」入面嘅檔案，如果真係想覆蓋咗程式資料夾入面嘅檔案嘅話，就噉將個新版檔案放喺「用戶資料夾」入面就可以。如果「程式資料夾」同埋「用戶資料夾」有同名檔案嘅話，小狼毫只會用「用戶資料夾」入面嗰個版本。
• 呢個教程所指嘅 「用戶資料夾」 係 %APPDATA%\Rime。

2.1.2 Rime檔案類型

如果你好奇撳開過「程式資料夾」或者「用戶資料夾」嚟睇嘅話，你應該會發現入面有一大堆yaml檔，一啲txt，同埋一個叫OpenCC嘅資料夾。唔使驚，呢啲檔案其實係Rime嘅骨幹配置文件，以下係佢哋嘅分工同埋功能：

• 設定檔
  • default.yaml：係Rime輸入法嘅主要配置文件，入面定義咗個 (i) 輸入法預設啓用咗嘅方案，(ii) 功能或者選單嘅快捷鍵，同埋 (iii) 唔同嘅Key Binding (例如用 - 同埋 = 掣嚟翻頁）。
  • weasel.yaml：係小狼毫前端嘅配置文件，當中主要處理 (i) 外觀，(ii) 字型, (iii) 字體大小等等嘅個人風格資料。
• 文字處理相關檔案
  • essay.txt：係Rime嘅基本語言模型同埋詞庫資料（又名「八股文」）。當中主要以官話嘅資料爲主。
  • punctuation.yaml：主要定義英文鍵盤上嘅標點符號同埋佢對應嘅中文全形標點。 入面亦都可以定義一鍵對應多個符號，好似 /掣咁，就包辦「、」同埋「／」咁。
  • symbols.yaml：定義咗一啲特殊符號嘅代碼，喺輸入法度打 / + 符號代碼就可以打嗰啲符號出嚟。好似輸入 /mj 就可以打哂咁多隻麻雀牌出嚟咁。
  • opencc\：呢個資料夾放嘅係繁簡轉換器，亦都支援兩岸三地唔同用字習慣嘅轉換。詳細請參閱：BYVoid/OpenCC
• 輸入法方案配置檔案
  • SCHEMA-ID.schema.yaml：係一個輸入法方案嘅配置檔案，入面定義唔同嘅容錯規則同埋處理用家輸入嘅規則（就好似倉頡打abc要轉換成日月金噉樣)。每個schema檔案開頭嘅字符串就係佢嘅schema id，呢個ID主要用嚟喺 default.yaml 入面啓用嗰個指定嘅輸入法方案。
  • SCHEMA-ID.dict.yaml：係一個輸入法方案嘅碼表。入面除咗定義內碼同埋對應嘅中文字之外，亦都可以定義詞頻、短句、組詞短碼等等嘅資料。